طليقة سامح عبد العزيز: نفسى يكون ده كابوس ويارب مكونش قصرت فى حقك

أعربت داليا فرج، طليقة المخرج الراحل سامح عبد العزيز وأم بناته، عن حزنها الشديد لوفاته، متمنية أن يكون خبر رحيله ما هو إلا كابوس وليس حقيقيا، مؤكدة أنه كان صاحب قلب طيب و"بيبي كبير وضخم".

وقالت داليا، عبر حسابها على فيس بوك، "اللى بينا حاجة مافيش غيرنا فاهمها، فاهمين تفاصيل بعض، وبنفهم بعض من نظرة، نتخانق بقى نزعل نحلف ما انكلم بعض تانى تقريبا ونص الصيام اللى بصومه رايح على الحلفان، وأول ما تكلمنى أنسى وأصالحك على طول عشان عارفة إن قلبك طيب، بيبى كبير وضخم وعشان اللى جوانا بتاعنا إحنا وبس".

وأضافت داليا، "مش حاجة ممكن تفهموها أو تسموها، لينا تأثير قوى على بعض وفيه حته جوة كل واحد فينا للتانى خاصة ومختلفة، عشرة عمرى حبيبي أبو بناتي، رغم انك مشيت بس اللى مريحنى إن آخر 20 يوم كنا مع بعض كلنا على طول".

وتابعت داليا، "يا رب ما اكونش قصرت فى حقك، هتوحشنى أوى يا حبيبى يا غالى زى ما كنت بأقولك دايما انت الغالى وترد حبيبتى، مش مصدقة إنى باقولها.. ربنا يرحمك يا حبيبى ويسكنك فسيح جناته ويقدرني على المسئولية، نفسى أنام وأصحى ألاقى ده كابوس و مش حقيقى، بدرى أوى أوى يا حبيبى، لا إله إلا الله.. هتوحشنى يا موحه".