فيديو.. ريم أحمد تكشف كواليس زواجها بالفنان طه خليفة في 8 الصبح
ظهرت الفنانة ريم أحمد بطلة مسلسل "يوميات ونيس"، للفنان الكبير محمد صبحي، والتي كانت وقتها الطفلة "هدى" بنت ونيس، ظهرت ريم أحمد صباح اليوم الجمعة في برنامج "8 الصبح" وهي حامل وقاربت على الإنجاب.. إطلالة ريم أحمد لم يتعودها المشاهدون، فالصورة الذهنية لدى الجمهور هي الطفلة الشقية العكروتة، ولكن الملاحظ أن شكلها لم يتغير كثيرا، ولا روحها المرحة.. وحضر مع ريم أحمد في اللقاء زوجها الفنان طه خليفة، ليحكي الاثنان كيف نشأت بينهما صداقة تطورت إلى حب فزواج.
في البداية حذرت الإعلامية داليا أشرف الفنان طه خليفة من أنه يزعلها، وقالت: إنت متجوز جوهرة.. يعني إياك تزعلها؛ لأن وراها رجالة، فرد زوجها: كتير..
وقالت ريم أحمد: هو متهدد من أمة لا إله إلا الله.
قال: لما بنكون في مول أو أي مكان بالاقي اللي يقول لي: خلي بالك منها. لو زعلتها تبقى زعلتنا.
إحساسك إيه من وانتي طفلة صغننة شايفينها دلوقتي، يعني هدى السوسة النوسة كمنوسة
دلوقتي هتبقى أم؟
معلنة أنها ستلد يوم 20 نوفمبر.
ضحكت ريم وقالت: الموضوع كوميدي بالنسبة لي بالصراحة؛ لأني أنا كريم أنا نفسي مش مستوعبة. فلما حد بيشوفني بيتخض، ويقول إيه ده إنتي خلاص هتولدي. أنا بابقي مراعية ظروفه لأني بابص في المراية وأقول إيه ده أنا خلاص هاولد. يعني انا مستغربة، وحاسة إنها خطوة كبيرة في حياتي ومختلفة، وبادعي ربنا إني أبقى أدها؛ لأني حاسة إنها مسئولية كبيرة.
وكشفت عن أن مولودها بنوتة.
وسألت طه: إيه إحساسك لما الناس كلها اتصدمت إن هدى حامل؟ ومنهم بابا ونيس (الفنان محمد صبحي) كتب بوست على الفيسبوك قال لك: هاتوا لي طه.
رد طه خليفة: أهم حاجة ربنا يقومها بالسلامة، والناس كلها تدعي لها إنها تقوم سالمة وبعافية، والبيبي بإذن الله تيجي سليمة.
سألته: وانت بتتفرج عليها وانت صغير كنت بتعمل إيه؟
أجاب بفكاهة: باطرشّ. الفكرة مش كنت صغنن قوي، لكن هي فتاة أحلام جيل بكامله.
سألته: اتقابلتو إزاي؟ واللقاء حصل إمتى؟
قالت ريم: إحنا زملا أصلا في معهد الفنون المسرحية من كام سنة.. مش هاقول.. من سنتين كده ولا حاجة.. من زمان قوي وكنا أنتيم على فكرة، وكان يعرف بنات كتير، وكان لما يتخاصموا أروح أصالحهم.. كنت باقول مثال الصداقة بين الولد والنبت أنا وطه. الحمد لله دمرناه.
سألت: طاب إيه اللي حوّل الصداقة إلى حب وزواج.
قالت ريم: أنا مش عارفة.. أنا اتغفلت. كنا صحاب جدا، يحكي لي عن همومه ومشاعره، وكان الموضوع عادي، فجأة لقيت الموضوع قلب.
ووجهت داليا سؤالها لزوج ريم أحمد: طاب إيه اللي لقيته في ريم مختلف عن بنات كتير، وقررت تتجوزها.. أصل قرار الولد إنه يتجوز في الأيام دي بقى صعب.
أجاب: هي راحة نفسية.. أنا كنت قلت لها حتى إن أنا كنت في كل المراحل، لما كنت بابق عايز أفضفض عايز أحكي عايز أقول فباروح لها.. أبقى عندي مشكلة مع حد فباروح لها هي. إنتي فاهمة التكوين النفسي ده؟ يعني أنا رجعت من دهب قلت لها يلا نتجوز.
سألت: ليه بقى؟
أجاب: لأنها على طول مصدر للأمان والثقة. بابقى مبسوط ومستريح وانا معاها طول الوقت. ما بابقاش شايل أو أتكلف أو أتعامل بأسلوب مختلف.
لمشاهدة الحلقة على قناة dmc على يوتيوب اضغط هنا
