قصيدة "الحياة سكة سفر".. في رثاء رفيق الروح
اللي قاعد واللي واقف
واللي ف الطرقة انحشر
واللي متشعبط وخايف
قشة غرقانة ف عفر
والمسطَّح والمشطَّح
والمقدِّد والممدِّد ف العدم
بين رجولهم اتردم
أصل فاكرينه حجر
واللي راكب وحده فاضي
واللي فطسانة بشيل
واللي مخنوق بس راضي
والمتيم بالشَّكَل
جنة دي ولا سقر؟
واللي واخداه الشهامة
واللي لو طال م الندامة
كان يبيدنا نفر نفر
واللي جايَّة على هواه
واللي مش فارقة معاه
قطر مزحوم بالصور
مهما يختلفوا البشر
كلنا في سكة سفر
ناس تخاصم ناس تصاحب
كله جوا القطر راكب
والطريق مهما يطول
كله صاير للنزول
لما تيجي محطته
تنطوي كده صفحته
يبقى ذكرى م القدر
قطر داير بينا داير
بالخزايا وبالبشاير
قطر متشوِّن بشر
شاب موكوس جاي يحب
ناس هرتنا بقشر لب
جَنبُه مقهور من مراته
واللي نقَّطنا بْسُكاته
أب متغطِّي بهمومه
أصله عايش يوم بيومه
لمَّا م الشدَّة كفر
عِمَّة بتقول ده ابتلاء
ما احنا في دار الشقاء
عمرنا بيضيع هدر
مهما يتخِنقوا البشر
كلنا في سكة سفر
طلقة طايحة بالقضا
غول بيعوي ف الفضا
قطر سابِق للزمن
ياكل الريف والمدن
واحنا في بطن الخطر
مهما يفترق البشر
حد منهم اعتبر؟
حد منهم افتكر
إننا ف سكة سفر؟
*******************************************
أعمال أخرى للكاتب:
قصيدة «خربطة» من ديوان «ترانيم وتهاويم»
عصارة تجربتي في الحياة.. حكم للأجيال (1)
عصارة تجربتي في الحياة.. حكم للأجيال (2)
