كلمة السيسي أثناء حضوره قداس عيد الميلاد المجيد (فيديو)

قال الرئيس عبدالفتاح السيسى: "عاهدنا ربنا وعاهدناكم وبدأنا مع بعض وإن شاء الله هنكمله مع بعض كلنا إيد واحدة". 

 وأضاف الرئيس السيسى: "الطريق زى ما بنقول طريق الجمهورية الجديدة تتسع للجميع ولينا كلنا دون فرق أو تمييز، نعيش فى سلام وأمان مع بعض.. الكلام ده لكل الناس للمصريين.. اوعوا حد يدخل بينا.. اوعوا حد يفتنا.. لأن ده مش هينتهى.. كل ما هنكمل وهننجح".

وتابع: "فى الأيام الجميلة دى.. والله إحنا بنحبكوا.. ربنا يعيننى إنى أكون خادم أمين وشريف للبلد دى، يارب يعيننا على كده.. خلينى أقولكم .. زى ما قولت البلد بلدنا كلنا تسعنا كلنا.. وإحنا ربنا سبحانه وتعالى هو اللى بيحمى.. إحنا فى بيت من بيوت ربنا.. ولازم تعرفوا إن اللى حامى البلد ربنا سبحانه وتعالى.. دايما ندعوه ونتوسل له يحمينا ويهدينا ويكملنا هو ربنا وبيسبب الأسباب".

 وقال: "الجمهورية الجديدة هى الحلم والأمل والعمل، القادرة وليست الغاشمة، المسالمة وليست المستسلمة.. هنبنى مع بعض .. أى تحدى وصعاب تهون لو إحنا كلنا على قلب راجل واحد.. كلنا مع بعض.. كل عام وأنتم بخير ومصر بخير والدنيا كلها بخير.. كنت أتمنى أسلم عليكم كلكم.. لكن يعنى ربنا يزيح عننا الجائحة ويحمينا ويحميكم كلكم".

واختتم الرئيس السيسى، كلمته، قائلا: "انتوا متعرفوش التقدير والمحبة اللى بكنها لقداسة البابا.. خلى بالكم الرجال توزن فى المواقف الصعبة جدا.. لكن قداسة البابا.. انتوا كمان تخلوا بالكم منه.

جاء ذلك خلال حضوره، مساء اليوم، الخميس، قداس عيد الميلاد المجيد، بكاتدرائية ميلاد المسيح، بالعاصمة الإدارية الجديدة، للتهنئة بعيد الميلاد المجيد.