هالة الكردي تكتب| إتعلم تبدأ

إبدأ، اوعي تفكر أنه فات وقت العلام، 

إبدأ ، اوعي تقول كبرت خلاص خلص الكلام،

في كل مرة فيها تفشل ده إشعار بنجاح جديد، 

في كل يوم بيعدي بيك دي بداية لعُمر مديد.

يمكن تغلبك الظروف ويمكن تقتلك الضغوط، 

هتقوم تقف وتقول لنفسك ما هو ده طبع الحياة،

بيبقي البقاء فيها للأقوى، مش أقوي سلطة ومش أقوي مال، مش أقوي صحة ولا أقوي جاه بس الأقوي إرادة وتحدي.

انسي كل جرح عيشته وأرمي وراك كل الإعاقة، وإبدأ انسج في خيالك صورة حلوة لحلم بكرة.

فكر في حاجة تخلي عقلك ينام يقوم يصحي عليها، 

خليها هدفك مهما ضحكو ومهما قالو تأكد إنك عليها تقدر.. واستثمر الجرح اللي عيشته في شحن طاقتك لما تيأس.

صحيح في يوم هنموت أكيد بس أي تسوي الحياة لو عشت موت فيها نكرة! ده ربنا خلقنا لرسالة، 

فاختار رسالتك واسعي ليها واخلص النية وداريها.

ولو وقعت ، إيه اللي يمنع ! 

أقع وقوم، وأضحك علي نفسك بنفسك، هتقتلهم ثقتك بنفسك، نفض هدومك من الحماقة ومن بواقي سنين سذاجة، طبيعي تقوي بعد مرة اتنين تلاتة، 

طول ما فيك نفس مكمل أصبر علي حلمك يجيك. 

كتير هتُحبط، هتحس إنك شخص فاضي شخص فاشل شخص لا يصلُح يكون، وإن كان كلامهم غصب عنك هيهزمك ويكسرك وتحاول إنك تتفهم فيسكتوك، ويحاولوا كل ما تعافر وتقوي يكسروك، اوعي تسمع واوعي تدخل في دواير صعب تفتح مهما دارت، 

بإيدك أنت حط خطة تسيب علامة لكل من هدم طموحك، وأما توصل اوعي برضو تيجي تثبت إنك قادر أو مثابر، سيب ماضيك وراك وكمل، وأمحي كل ذكري اتسببت في جرح عيشته، أو في ليل حزين كتمته، وساب في قلبك ألف نغزة وألف كسرة، ارمي كله وراك وكمل بابتسامة، بسمة تحمل ألف معني، 

ألف نصر وألف حلم بألف مغزي، ابتسامة نابعة من قلبك حقيقي مش مجاملة أو مكابرة، وأخلص النية هتكسب، صدقني هي دي الحسنة اللي باقية، 

لو تنصلح صلُحت بها نفوس العباد وإن فسدت عشنا بسببها في وسط غابة نهارها ضلمة .. قوم وجرب مش هتخسر حتي لو فشلت محاولة، واقفل علي حياتك بناسها، باللي باقي من صحابك من قرايبك من معارفك.

اللي وقفو معاك في ضيقتك، 

اللي سندو واللي شالو معاك حمولتك، 

اللي لما صرخت فيهم جريو عليك مش خافو منك، واحفظ كل جميل في قلبك ماهي دنيا فانية فخلي قاعدتك فيها مريحة، كلام الناس عمره ما قدم بس الأكيد دائما يأخر، خلي مرجعك ضميرك وقبله ربك وعيش حياتك اتبسط وأضحك وكركر، استغل سنين شبابك عشان ما يجيش اليوم وتندم، 

تندم علي عمر الربيع وتقول ياريتني ما ضيعت لحظة في خوف وحزن ويا تري مين ليك هيبقي.