هالة الكردي تكتب| في نص دقيقة
الجمعة 20/يناير/2023 - 11:43 م
هالة الكردي
في نص دقيقة
إيه رأيك تبيعي شكلك، تبيعي حُسنك فنص دقيقة
وتتمايلي وتتعوجي وتتشالي وتتحطي في نص دقيقة
هتتشهري وتتعرفي وتبقي سيرتك النكرة في كام ثانية حديث الناس وللأسف بقي حقيقة.
هتحكي شوية عن حالك، ولفي ودوري وابتسمي وأنتي بتعرضي قوامك.
وقولي إنها مهنة، حكم الزمن عليكي بيها.
وحايلي عينيكي تتمسكن، وتسندك بكام دمعة تدوب عين الرجال فيها.
وأوعي تفكري في بكرة ولا في شكلك قصاد أهلك.
وأوعي تفكري في عيال، يلوموكي في مراهقتهم علي سذاجتك.
بنص دقيقة من يومك (بحساباتي) كمان سنتين تعيشي وأنتي سلطانة، برنسيسة.
ولو كان المقابل ذُل (ايه المانع) ما تبالغيش طالما هيصتي في الهيصة.
يا ألف خسارة وخسارة علي وش كان في طفولته بريء.
وشوش راح الحيا منها وحطو بداله وش جريء.
زمن ملعون، رجع بينا لجهل قريش بفرق بسيط.
زمان كانت بقهر وغصب ودلوقتي بقي منافسة.
زمن بقي كل شيء فيه مباح، زمن بينادي عالغافلين بعلو الصوت (قرب جرب، مين ياخد ومين زود) تعالي وشيل.
زمن اتقسمو فيه الناس ٧ أنصاص بدل نصين.
ناس عايزينها بكرامة وناس حبينها بمهانة وناس لا عاجبها خلقتها وناس مش عايزة فطرتها وناس ماشية بدون أخلاق وناس ناسية أن فيه الخلّاق وناس بايعة نفوسها رخيص بقت غابة.
يا عالم فوقو لولادكم وأعراضكم، عليهم يوم هتتحاسبو الحساب ضعفين.
مشاهدة كتير، فلوس ملايين، هتضحكو يوم وتبكو سنين.
سنين هتعدي بتلطخ في سيرة وسمعة وأمانة،
أمانة لما تتسألو عليها هناك، ساعتها جاوبو وأفتكرو دي ضاعت فين؟
