ميدان الرياضة

ثريا محمد.. نستعد للسوبر المحلي وبهدي بطولة أفريقيا لابني

الأربعاء 17/ديسمبر/2025 - 12:07 ص

أحمد حنورة

حقق النادي الأهلي لكرة السلة سيدات الفوز بالبطولة الأفريقية لأول مرة في تاريخه .. التقينا باللاعبة ثريا محمد لاعبة المارد الأحمر ومن أهم الأعمدة التي يرتكز عليها الفريق في كل البطولات فقد عبرت اللاعبة عن سعادتها عقب التتويج قائلة :- سعيدة جدا باللقب وخصوصا إنه اللقب الأول في تاريخ النادي وأمام جمهورنا وعلي أرضنا ووسط أسرنا فكل هذا يجعلها من أحلا البطولات اللي لعبتها .. حاجة مشرفة جدا .. والجمهور كان عامل حالة للفريق ومكسبنا كان بالجمهور .

وأضافت ثريا :- كل الماتشات كانت صعبة لأن نظام البطولة كنا محتاجين نكسب فرق اسكور عشان نطلع أول المجموعات كلها لأن الترتيب بالاسكور مش بمين كسب مين فيعتبر كل ماتش بالنسبالنا فاينل .

كانت مباراة قوية وخصوصا الفريق دا كويس جدا لأنهم كسبوا البطولة ٣ مرات من قبل ، وفرقة جاهزة ومتعودة علي اللعب وسط جمهور وكسبونا السنة اللي فاتت فكنا محتاجين نكسبهم المرادي وعملنا دا وكسبنا فرق اسكور الحمد لله .

كابتن طارق خيري كان بيدرس كل فرق البطولة ويتابعها وكان بيعملنا اجتماعات فيديو عشان نشوف كل الفرق وعرفنا نقاط القوة والضعف عندهم وقدرنا نلعب علي عيوبهم وكسبنا الحمد لله .

وأسردت اللاعبة قائلة :- من أحلي البطولات اللي اتلعبت في وجود الجمهور داخل صالة .. أما جمهور الأهلي دا حاجة مختلفة تماما .. وبحب جدا ألعب في وجودهم ومفيش حاجة تقدر توصف حبي ليهم .

ما هي رسالتك لجمهور الأهلي ؟ هي رسالة شكر علي وجودهم ودعمهم لينا في كل المباريات من مرحلة المجموعات إلي النهائي ، وبوعدهم بكل البطولات باذن الله هتكون من نصيب النادي الأهلي .

عملنا معسكر مغلق بعد وصول المحترفات مباشرة وبدأنا نتمرن مع بعض واحنا كنا نعرفهم قبل كدا لأننا لعبنا أمام بعض وهما قدروا يخدوا علينا بسرعة ودا كان عامل كويس وعامل تجانس حلو بين الفريق .

مركزين جدا لبطولة السوبر يوم ٢١ ديسمبر وكأس مصر والدوري ، وإن شاء نكسبهم ويبقي كسبنا كل البطولات .

وأختتمت ثريا محمد الحوار قائلة :- بهدي البطولة لجمهور النادي الأهلي ومجلس إدارته والجهاز الفني والطبي والإداري وأيضا لأسرتي وخصوصا ابني لأنه أتم سنة في أول بطولة دولية ليا في وجوده وسطنا .