سمر حمزة لـ «الحياة اليوم»: كنت متأكدة مليون في المية هجيب ذهب
بعد تحقيقها ميدالية ذهبية في دورة ألعاب البحر المتوسط، التقينا باللاعبة سمر حمزة لتسرد لنا بعض التفاصيل في مشوارها الرياضي.. وإليكم نص الحوار:
إحساسك إيه بعد التتويج بالبطولة؟
حاجة ما تتوصفش، تعبت وشقيت وضحيت بحاجات، فربنا أكرمني بالذهب.
إيه أصعب لحظة واجهتك خلال مشوار البطولة؟
إن الناس ما كانتش مصدقة إني هقدر أقف على رجلي تاني.
هل كنتِ متوقعة تحقيق اللقب قبل بداية المنافسات؟
كنت متأكدة مليون في المية هجيب ذهب.
مين كانت أصعب منافسة واجهتك في البطولة؟
كلهم زي بعض لأني لاعبت أغلبهم قبل كده، وأغلبهم أبطال عالم وأبطال أوروبا وأنا كنت متخطياهم قبل كده الحمد لله، ولكن تركيا أول مرة ألعب معاهم، وهيا بطلة كويسة جداً.. الماتش مشي تكتيكي أكتر من إني أخش معاها في قوة، وكنت واثقة من الفوز.. كان عندي ثقة في ربنا إن البطولة بتاعتي عشان تعبت، وضاع عليا بطولتين بسبب الإصابة قبل بطولة أفريقيا بأسبوع وما لعبتش، وكان في معسكر ما كنتش بنزل بسبب الإصابة في رجلي، فجهزت رجلي ودخلت دورة ألعاب البحر المتوسط، فأنا بتمرن من بدري جداً عشان أتنافس في البطولة.
ما سر الحفاظ على التركيز حتى المباراة النهائية؟
جوزي وابني.. تعب جوزي معايا ومجهوده، أما ابني فيفتخر بيا ويقول: "ماما عملت كل حاجة في الرياضة وأنا نفسي على الأقل أكون زيها وأكون قدوة له".. وبالمناسبة دي أول ذهب مع ابني.
قد إيه استغرق منكِ التحضير للبطولة؟
طول السنة كنت بتمرن.
إيه أصعب جزء في برنامج الإعداد البدني والفني؟
لما رجعت بعد الولادة كان وزني 109 كيلو وكنت بنزل وزني، وبعدها مراحل الأمومة كانت صعبة جداً بالنسبة لي، وعدم النوم... إلخ.
هل كان هناك ضغط كبير عليكِ بسبب التوقعات بتحقيق الميدالية الذهبية؟
ما عنديش ضغط لأن أنا ما كنتش بحب أسمع لكلام سلبي، كل الدافع قدامي إني أروح أحقق الذهب.. عيني على الذهب مش على أي حاجة تانية.
كيف تعاملتِ مع أي إصابة أو إرهاق خلال البطولة؟
أهّلت رجلي كويس وصبرت عليها وما استعجلتش، والحمد لله بقيت أحسن وقدمت أفضل ما لدي في البطولة.
مين أكثر شخص كان داعماً لكِ خلال فترة الإعداد؟
زوجي أولاً، ثم أصدقائي والمدربون والدكاترة.
ماذا يعني لكِ رفع علم مصر على منصة التتويج؟
ده حاجة كبيرة أوي وبفخر بيها دائماً، عشان أنا بحب بلدي وبحب أكون مختلفة بين الدول اللي برة.
هل تشعرين أن مسؤولية تمثيل مصر أصبحت أكبر مع كل بطولة؟
آه طبعاً، وما عنديش خيار تاني غير إني أفضّل بطلة عالم باسم مصر، وبإذن الله النتائج القادمة هتكون باسم مصر.
ما الرسالة التي توجهينها للجمهور المصري الذي ساندك؟
شكراً ليهم على حبهم اللي ظهر بعد البطولة وفرحتهم بيا، وما كنتش متخيلة كمية الحب دي، وإن شاء الله أفرحهم دائماً.
بعد هذا التتويج.. ما البطولة أو الهدف القادم؟
إني أشتغل على التأهيل للأولمبياد، وعندي بطولة عالم آخر شهر أكتوبر.
هل هناك هدف محدد تسعين لتحقيقه خلال الفترة المقبلة؟
آه، الهدف الكبير بطولة العالم، وبإذن الله أحقق ميدالية في الأولمبياد.
ماذا ينقص المصارعة المصرية للوصول إلى مزيد من الإنجازات العالمية؟
إننا نهتم باللاعيبة بزيادة ونوفر لهم كل سبل الراحة عشان يوصلوا لمنصات التتويج.
ما النصيحة التي تقدمينها لأي فتاة مصرية تحلم بأن تصبح بطلة في المصارعة؟
إنها هتكون قادرة تعمل أي حاجة طالما عندك إيمان بربنا وقدرة إنك تعملي الحاجة دي، ومفيش حاجة مستحيلة.
لو هنختصر مشوارك في البطولة في كلمتين هيكونوا إيه وليه؟
صبرت ونولت.. ونفسي أصبر وأنول الأولمبياد إن شاء الله.. ﴿إِنَّ الَّذِينَ آمَنُوا وَعَمِلُوا الصَّالِحَاتِ إِنَّا لَا نُضِيعُ أَجْرَ مَنْ أَحْسَنَ عَمَلًا﴾.
