قصيدة "الخلاصة في كلمتين"

في اتجاه حِلمُه العَنيد

زعلان ومتأخر على ميعاد رِحلتُه

والباص بعيد

م السُرعَة اتكعبل في حُفرة

رِجلُه سَقطِت واتلوت

صوتُه بدأ يصرخ ويبكي

ويندب الحَظ الهِباب

وفجأة عَدّى القطر طلقَة

داس على كُل الصحاب

مات اللي مات واللي انجرح

أمّا هو عاش سَليم

اتخطف م الرعب والتفاصيل

وساد الصمت

سَرَح في أحداث رحلته

وقلبه بالحزن اتملى

لكن فهم معنى الحياة

وقد إيه أقدارنا رحمة

والحمد لله جت سليمة

والحفرة كانت طوق نجاة

أعمارنا رحلة

والهدف هُوَّ الوصول

وازاي هتنسى عشرة أولاد الأصول

كام كهل بيعافر مع العمر العنيد

وبسرعة البرق طفل يوصل جنّته

ويعيش سعيد

يا تعيشها نجم

في دنيا ملامحها النفاق

يا تعيشها صادق

إن شاالله حتى تعيش وحيد