محاكمة عقل ما لهوش قلب

لو طاوعت عقلك بس تنشف الروح، تجفّ، تموت. ولو طاوعت قلبك وبس تبقى عبيط،

وتضيّع كل شيء موزون في رحلتك. لازم ميزان حساس يوزن قرارك؛ علشان لو اخترت الغلط تعرف أوام إنك غلط، وتصحح مسارك ما تكابرش.

رد الواقع عليه، وقال: القلب مخلوق عنيد. طفل مُدلل مُراهق مُتمرد ما لناش عليه سُلطان. صحيح شخصية الإنسان بتفرِق، فيه اللي عقله شديد قوي جبار ما عندوش قلب، في لحظة يكون خصم وحكم قاضي وجلاد بيسمع كلام نفسه ويحكم على القلب المسكين بالبتر والنفي والحبس والتعذيب؛ علشان يعيش العقل راضي بحكمته، وبعد الحكم بالإعدام، يندم أشد الندم، بعد ما يكتشف إن القرار أهوج ومش محسوب، وإن العقل كان غلطان؛ لأن اللي بيوجع القلب بيقتل العقل من شدة الألم، وبتموت السعادة للأبد، وبيموت بعدها الإنسان.

وحديث طويــــــــــــــــــــــــل دار بينهم لآخر الليل.

كانت قعدة عَرَب بين الكبار، بيقولوا كلمة حق. سرحت بخيالي لزماااان، وأيام زمان الحلوة، لما كنت بقلب أخضر بريء عاشق وما لهوش عقل، أيام ما كنت لما أفرح أفرح قوي ي ي، ولما أحزن أحزن قوي ي ي، أيام ماكنا بنعشق طعم الملح والسكر وإحساس الفروق بينهم، قبل ما نكبر قوي، ويكبر عقلنا، ويحرمنا طعم الحياة.