فيديو| "الحياة اليوم" تنشر محاضرة وزير التعليم عن نظام التقييم الجديد بالمرحلة الثانوية

نشر الدكتور طارق شوقي، وزير التربية والتعليم والتعليم الفني، على حسابه الشخصي على مواقع التواصل الاجتماعي فيسبوك، محاضرة عن فلسفة نظام التقييم الجديد في المرحلة الثانوية وكيفية التحضير باستخدام بنك المعرفة المصري.

ليه بنحاول نغير نظام التقييم؟

وسجل شوقي المحاضرة بمناسبة افتتاح القناة التعليمية الثانية «مدرستنا 2» قبل 10 أيام، وقال شوقي خلال المحاضرة: «عاوزين نتكلم مع بعض شوية بدون تكليف، عشان نحاول نقول لحضراتكم ليه بنحاول نغير نظام التقييم وليه بنذاكر من بنك المعرفة، وإيه اللي موجود على المنصة وإزاي بنعمل الأسئلة الجديدة وإيه اللي هنذاكره وإيه المقرر».

ليه بنتكلم عن الفهم والحفظ وطريقة الأسئلة الجديدة؟

وتابع وزير التربية والتعليم: «إنتوا بتسمعونا بنتكلم عن الفهم والحفظ وطريقة الأسئلة الجديدة، ويمكن انتوا مش عارفين إحنا بنعمل كدا ليه، وبنتكلم كتير عن مهارات زي حل المشكلات والتفكير الناقد والإبداع، وفي الناحية التانية الناس بتتكلم عن الامتحانات والأسئلة والمقرر واللي مش مقرر، وفي نفس الوقت مشكلة عالمية العالم كله نفسه يحلها ومش عارف يتصرف فيها وهي جائحة كورونا».

الدولة اللي هتوصل لعلاج أو لقاح كورونا  هتكسب كتير  

وأضاف شوقي: «حل المشكلة دي إما نلاقي علاج ليها أو لقاح ضد الفيروس، واللي هيقوم بالمهمة دي العلماء المتخصصين في ده، والدولة اللي هتوصل لكده هتكسب كتير  جدا، وهتمتلك قوة كبيرة بعلمائها اللي توصَّلوا لحل مشكلة علمية ما كانتش قدامهم وهما بيدرسوا، ولكن اللي هيحل المشكلة دي فاهم كويس جدا وهيقدر يحل مشكلة هو ما شافهاش قبل كدا».

التقييم لازم يكون على فهم نواتج التعلم

وأكد وزير التعليم، أن «المهارات الحقيقة هي التي يبحث عنها النظام التعليمي الجديد، وما بندورش على المهارات القديمة اللي كانت مفيدة من 100 سنة، والعصر اللي إحنا فيه محتاج نتمكن من أدوات جديدة زي التكنولوجيا اللي ما كانتش موجودة زمان، بس موجودة دلوقتي واتعلمناها وإحنا كبار، لكن اللي هيعيش الـ50 سنة الجايين لازم يتعلم الحاجات دي ويكون فاهم الأمور دي وما يكونش حافظ، لأننا مبقيناش محتاجين نحفظ لأنه معانا تليفونات وآيباد وأجهزة كتيرة، واللي كان موجود في الأربعينيات والخمسينيات مابقاش ضروري النهارده، وعشان كدا التقييم لازم يكون على فهم نواتج التعلم».

ما يبقاش شغلك الشاغل السؤال اللي هييجي في الامتحان

واختتم شوقي: «عاوزين لما نيجي ندرس حاجة زي جهاز المناعة في الجسم أبقى فهمت يعني إيه جهاز المناعة، وما يبقاش شغلي الشاغل إيه هو السؤال اللي هييجي في الامتحان، لأني باسعى للحصول على الدرجة، وممكن أفهم جهاز المناعة لأن هي دي المهارة اللي مهتمين تكون موجودة في كل المواد وناخد درجات بالفهم، ومش لازم تكون الطريقة القديمة هي مصدر الحصول على درجات».