قصيدة: إنت مين؟!
ناس بتبني وناس بتهد
ناس بتحفر ناس بتسدّ
واللي يقطع واللي يمدّ
واللي يصرف واللي يعدّ
واللي يهجُر واللي يودّ
واللي يرخي واللي يشدّ
واللي يسكت واللي يردّ
واللي يشكر واللي يعضّ
واللي يشبُك واللي يفُضّ
واللي يلعَب وقت الجَدّ
واللي وقت الجَد يسدّ
واللي تاجر بالغلبان
باع الوجع وكسب ملايين
وجاي بيسأل بعد نظرة سُخرية
أنا ابقى مين؟!
ردّيت بعزّة وقلت له :
الله أكبر سيف ودِرع المسلمين
معاك حفيد آدم خليفة ربّنا
اللي من خلق الوجود به نستعين
اسمع يا صوت الكِبر صوتي وقول آمين
كُلّنا في الأصل طين
بس درجات مخلوقين
فيه أنبيه وفيه أولية
وفيه ناس غلابة وطيبين
وفيه ناس بقر ما لهمش عازة
وناس وحوش ما لهمش دين
في أعراض العباد ناهشين
وعَ المال الحرام عايشين
وبحروف الكلام قادرين
يهدّوا كل صرح متين
وناس ديابة مع الغلابة
لكن بين الأسود خادمين
بيسلِّكوا أمورهم ومصالحهم
بتتظبّط ما بين الاتنين
ربّك بيمهلهم صحيح
لكن يا ويل الظالمين
وناس بُساااااط أوي طيبين
عايشين ما بيننا مجهولين
الفجر يِدَّن تلحقه وتقول يا رب
احفظ ولادنا وأرضنا
وتاريخ جدودنا وعرضنا
واللي بيبني مجدنا
واسترنا دنيا ودين
ويناموا في الليل مرتاحين
كده قُلت لك
أنا ابقى مين
شدّيت سِلاحي بكلمتي
وبكل حرف في خزنتي
قتلت كِبر عنيد جبان
صِغر أوي وصبح دُخَان
ذكَرت اسم الله وقلت:
يا اللي انت مِن بذرة شيطان
اظهر وبان
