هالة الكردي تكتب | إنتي عايزه مني إيه؟
الإثنين 01/نوفمبر/2021 - 08:53 ص
هالة الكردي
طباعة
قاعدة بينهم مستغربة ومقدرة،
كل واحد فيهم عنده فعلا مشكلة،
بسمع بدقة كل حد مشكلته فين،
هو ثائر وفي عز غضبه،
وهي بتحاول بجهد تشرح لنا إيه والحكاية،
مش قادرة توصف،
بس أنا فاهماها طبعا،
فاهمة غضبها وصمتها،
فاهمة دموعها وضعفها،
وإن حصل وقدرت توضح ودي تبقي معجزة السنين؛ وأُلهمَت الشرح فعلا هتلاقي نفسك صعب تستقبل كلامها،
لم تكن غبية أو مختلة،
هي حتي لم يتلعثم لسانها،
لكن هي متشتتة،
ولو أصريت تسمع لها،
هتُصاب بحالة من الجنون، وأيضاً حالة من التعجب،
هتحس نفسك شوية تايه أو ملخبط وبتناقض في كل كلمة طالعة منها،
في كل شكوي،
وفجأة تبدأ فطرتك تسيطر كراجل
وتلاقي نفسك بدأت تتنمر سواء بنظرة أو بضحكة سخرية تثير غضبها،
وكلامها فجأة هيبقي ليك كله في "كوم يتشال بعيد، أو يترمي مالوش لزوم"، لأنه طبعا لن يرقي لدرجة رزانتك،
أو تحاول تفهمه وتتفهمه أو تحتويه.
عيني حاضر اتفضلي، اتكلمي، اديني هسمع وأحاول أفهم، لكن قولي يرضيكي إيه؟
طب بس بالراحة شوية مش حرب هي ولا أي؟
عايز أعرف أعمل إيه كي تسكتي؟
مش عايز زن ولا نكد،
مش عايز لوم ولا عتاب،
ولا تأنيب ولا تنغيص،
بتمني أرجع بيتنا يوم أرتاح وأروق،
وأحس بشوية هدوء،
الاقيكي مبتسمة في وشي،
الاقيكي مستنية أرجع حُب فيا مش توعُد بالخناق،
وكمان سعيدة واحسها من جوه قلبك عشان بحبك،
وعشان بحبك كل حاجة فيا مرتبطة بمزاجك،
غضبانة بغضب، سكتي بسكت،
لو شكيتي أو عاتبتي بفتكرلك كل هفوة، وبتلكك علي أي غلطة.
لو ضحكتي دنيتي ليا تنور،
لو تغيبي ببقي بجري عليكي أدور،
تعبت من النكد في قربك،
وإن خيروني مقدرش أعيش ولا يوم في بعدك.
بس عايز أبقي سعيد معاكي،
قوليلي أرجع تاني ازاي أنول رضاكي؟
خليك معايا شوية بس وسيبها تهدي،
وإنتي روقي وإهدي بس يا بنتي حبة، ركز معايا وأنا هقولك ازاي هترضي،
ما أنا ست برده زيها وقادرة أفهم طبعها،
قادرة أحس باللخبطة اللي في فكرها،
عايزاك يا سيدي تبقي دائما جنبها، بس برده ما تخنقهاش، ما تبقاش وراها وراها زي ضلها،
عايزه وجودك في الحياة يبقي أكثر بالمشاعر، بالتفاهم، مش بتختم كل يوم جيت وانصرفت زي شغل الموظفين،
بتقول زمان!
ما هي برده عايزه ترجع تحس روحها نجمة صعبة المنال، لما كنت بتعافر عشان توصلها أيام زمان،
عايزه منك احترام، احترام في كل حاجة مش بس أسلوب الكلام،
عايزه بينكم يبقي فيه اخد وعطا، عايزه ترجع تحس تاني بنفس خوفك بنفس غيرتك بنفس شوقك ليها زمان،
عايزه منك المشاركة في أي حاجة وكل حاجة حتي لو كانت بسيطة،
قولها رأيك في ذوقها بكل حب،
وبطريقة تحس بيها إن رأيك فيها جد،
مش مجاملة أو فض جلسة،
عايزه رأيك في اختيارها لأي حاجة بتشتريها أو حتي جايباها في بيتك أو حتي لو هتهادي بيها،
إوصفلها قد أي مستقوي بيها وبتبقي متطمن معاها وطمنها برده إن أنت دائما في ضهرها، اديها رأيك في شغلها، لون شعرها، مش بس قاعد تتفرج هنا وهنا علي أي واحدة هي أحلي منها،
وأدخل معاها في تفاصيل حياتها حتي في اختيار صحابها، قولها دائما مهما كبرتي هتفضلي في عيوني بنتي،
اوعي تبخل يوم عليها بكلمة حلوة أو فسحة حلوة وهدية حلوة تبقي ليها هي بس، مش حاجة تنفع وقت ضيقة أو تحس أنه بالمرة يلا جابلي حاجة في وسط مليون حاجة تانية،
ضحكها برده وأرسم البسمة في عيونها بنكتة حلوة بينك وبينها بس اوعي تقل هيبتك اوعي تضحك الناس عليك وتقل قيمتك أو قيمتها،
عايزاك قوي، عايزاك تقيل مع أي حد بس أمامها ورقة شجر ضعيفة أمام سحرها ، عايزاك تبطل تتهمها بنقص دينها أو دماغها أو حتي خلل هرموناتها.
وأبقي طبطب عليها برده وماله يعني، ماهي لمًا تهدي هيجي يوم هي تطبطب.
بص أقولك! أنت حاول تحتويها، لما تغلط مش لازم تيجي عليها، ما أنت أبوها وبرده زيك زي أخوها أهدي حبة وأوعي ليهم تشتكيها حتي لو هي شكت، هي ست واحنا الشكوي طبع فينا.
وأبقي صالحها برده عادي،
تعالي علي نفسك عشانها
ما إحنا بنحب الحاجات دي،
الحكاية أبسط من البساطة صدقوني طول ما لسة بتحبو بعض والعيشة مش صعبة بينكم،
والحياة برده من غير مشاكل مش مريحة، لا ليها لون ولا أي طعم ماهو أصل من غيرها هنعرف منين قيمة وجودنا عند بعض؟
اه صحيح نسيت أقولك لو لقيتها ساكتة شوية سيبها ساكتة،
هي فيه مليون حاجة شاغلة بالها بس ما تسيبهاش كتير ولا نسيت كلامنا عن المشاركة!
هديتي يا ستي؟
خلاص هيعمل كل حاجة قولناهاله،
وأنت يا سيدنا فهمت حاجة من الكلام ده ولا لسه؟
