هالة الكردي تكتب | تخيل للحظة
الإثنين 07/أغسطس/2023 - 02:21 ص
تخيل للحظة ….
تغمض عينيك، تفتح عينك
تلقي الحقيقة فجأة بقت احتمال
وتتكسر صورتك في عينك ونفسك
فلحظة افتكرت طولت فيها الجبال
جوارحك بتبكي بس عينك بتضحك
ومهزوزة ثقتك في روحك يا غالي
ونزلوك اللي منك وبخسو بيك التمن
وأنت اللي كان مكانك هناك فوق فالاعالي
صريخك وآهتك محدش داري بيهم
ولا حد شايف علي ملامحك أثر
وجواك قلب محروق بخذلان وخيبة
وخيط أمل انقطع بعد خبطة بحجر
وماشي تكلم في الطريق وفي النجوم
وروحك تايهة وسط زحمة البشر
حكيت ومهما قولت لسة صاحي الألم
ولا شيء يبرد قلب ضحي وندم
بتنطفي روحك يوم من بعد يوم
وعايش في وهم بس نفسك يطول
لا حد فإيده حلك أو يمدك بعُون
ولا حد قادر ياخد مكانك أو يكون
بسهولة كل حاجة ضاعت وصبحت سراب!
و آه والف آه من اللي ساوي بيك التراب
فرضو عليك الذل وقالو أهون من الفراق
وقالو أرضي بنصيبك مع إنك دائما كنت حر
ولما آن أوان تقف وتقول كلمتك
جيت تقف وقعت من غدر طعنة قهرتك
عملت إيه بصدقك ولا بطيبتك يا طيب؟
هتعمل أي في مصيبتك وأنت نهايتك قريب؟
هتسأل مين يدلك وإنت الغاليين باعوك !
تصدق تاني مين وإنت اللي منك كسّروك
دخلت في لعبة أكبر من حدود توقعاتك
مشيت ورا وهم
عيشت فيه بكل طاقتك، بذلت فيه كل جهدك، ويا دوب قربت توصل
قام الكل راح وسابك
لوحدك بس تقدر تنجي نفسك وتشفي
ولما جيت تفوق لقيت دواك هو دائك !
تقوم تصلي، تدعي، وتبكي وتخشع
وتلقي ألفين سبب يوقفوك برضو في مكانك
يا أهل الله الحل إيه، حد يلبي ندايا
نداء قلب موجوع بيصرخ تايه في الفضا
لا منك بتتنفس عشان تقدر تعيش
ولا حتي قادر تنهي وجع ما بينتهيش
يا ميت حسرة عليك
علي بشاشتك وصفوك
حسدوك يا غالي ياللي شافو فرحك أذي.
الكلمات المفتاحية
