قصيدة الغلطة فين؟!
تعالى قول لي الغلطة فين
لما تحصد شوك بيجرح
وانت زارع ورد
لما تبني العِش ريش متعوب عليه ما تعيشّ فيه
وتعيش وحيد تحت المطر والغربة برد
لما تروي الأرض رَحمة
والبذور مبدورة حِكمة
والوعود تنفذ بكلمة
والغصون تشتدّ
لما تمنح زرعتك كل اهتمام
تسقيها خير من حُب مخلوط باحترام
وبدون سبب وقت الحصاد
تلاقي زرعك جفّ
ينحرق حِلمك وعِلمك
وف لحظة تاخد كفّ
م الصدمة تشعر بالعَمَى
ترفع كفوفك للسما وتقول يا ربّ
أنا إيه عملته في دنيتي أتعاقب عليه؟!
هترد وتقول إيه؟!
كان نفسي أقول: الله
لكن حاشتني الآاااااااه من كُتر الوَجع
عارف ياصاحبي الغلطة فين؟!
يمكن زرعت في أرض بور
ولا كان عيب في البذور
يمكن زرعت الحلم سهو في أرض غيرك
حصد شباب عمرك في صمت
وعاش في خيرك
أو تكون ضحِّيت بنفسك والسعادة ما عشتهاش
وامَّا شُفت القطر عدَّى واتنسيت فُقْت فجأة
بس يا خسارة اللي عدّى عُمر راح منك بلاش
لو رجع بيك الزمان فوق لنفسك
شكلك غشيم
جاهل بأسرار الفِلاحة ومكرها وعامل عَليم
قول واعترف إنك عبيط
كُنت فاكرك واد إوِر ساهِي وحَويط
تعالى خد لك كاس مرار
واكتب حروف إسمك في قايمة الانتظار
الموت بقى بطعم الحياة
وما عدش ينفع اعتذار
*****************************
إبداعات أخرى للكاتب:
جنون المراهقين عباقرة المستقبل