قصيدة أبسط فنون الاختيار
شدِّي الحزام
وبأقوى قبضة ع اللِجام
اطعنيه بخنجر ف عقله
اللي أصبح مش تمام
مين اللي قال علشان حصان
يكسر قيوده ويبقى حُرّ؟!
مين اللي قال علشان باحِبّه اتنفِّسه؟!
وأنا أرضِي عطشانة لوجوده
وعشت شهد العُمر مُرّ
زعلان عشان خايفة عليه
وبكل قوّة بالجِّمه
زعلان عشان بيحبني
وانا مِنّي دايمًا باحْرِمه
اتكلموا قولوا يا ناس
غلطانة أنا؟
غلطانة طبعًا والغلط راكبك
ليه تَقرَّبي لأنفاس حصان
وتحضنيه بقلبك؟!
دلوقتي جايَّة بتلوميه
قال إيه عشان حبِّك
فُكِّي قيودِك وابعدي
أيام ويرجع حُرّ
يرموا حمول الكُون عليه
ويشدَّها ويجُرّ
سيبي الحصان يعشق فرس
هتحسّ بيه وتتنفَّسه
وإن كان حمار عامل حصان
هتعضُّه بعد ما ترفصه
أما انتي عيشي في صومعة
مارسي فنون المَجْدَعة
وان حن يوم ليكي ورجع
ارمي ف وشّه البَردَعة علشان حمار
واتعلمي أبسط فنون الإختيار
*****************************
أعمال سابقة للفنان محمد سلامة:
جنون المراهقين عباقرة المستقبل